Солидарност: дали протестите во Србија заслужуваат поддршка?

Поминаа неколку недели од несреќата во Нови Сад, кога по пад на дел од железничката станица, животот го загубија 15 луѓе. Еден месец по несреќата, вознемирени и поттикнати од немилиот настан, студентите од Факултетот за драмски уметности во Белград организираа мирен протест во знак на одавање чест и почит на настраданите, барање одговорност и реакција од надлежните институции. На 22 декември, недела, во Белград се случија можеби најголемите протести во поновата историја на овие простори. Протестите беа организирани од студентите, средношколците, академската заедница и граѓанските организации, а според својата големина и енергичност беа на ист, а можеби и повисок ранг во споредба со протестите во 90-тите години од минатиот век во главниот град на нашиот северен сосед. Протестот започна во духот на солидарноста со петнаесетминутно молчење, а како жители на градот на меѓународната солидарност, а пред сѐ колеги, поддршката кон српските студенти е потребна најмногу од морален аспект.

Сакам да верувам во исказите дека овие протести во својата срж се студентски, организирани со млада енергичност и елан, спротивно на тезата дека се политички оркестрирани и финансирани од домашни или странски служби. Колегите студенти од универзитетите во Србија одлучија да го демонстрираат чувството на револт, несогласување и вознемиреност поради несреќата, на улиците и булеварите, а понесени од големата поддршка, тие продолжуваат.

Протестите се примарен чин за искажување незадоволство кога се работи за ваков вид несреќни случки, со надеж дека ќе излезат неправилностите и нерегуларностите на виделина, а неретко и секундарен за искажување револт кога се во прашање ситуации на занемарување или нерешителност за решавање на образовни, економски и општествени проблеми од страна на институциите. Во секој случај, тие треба да претставуваат порака и настојување кон одговори, со нагласено отсуство на немири и оградувања од политичка мотивираност, а дополнително да бидат и простор за размислување за реализација на дополнителен тип акција и барање решенија. 

Протестите во Европа и на овие простори се појавиле одамна, и како општествен крик го искажуваат револтот кон неправдите, политиките и латентноста на надлежните, отпорот кон воени или полициски репресии, а резултираат со целосно позитивен ефект на решавање на прашањата, или бележат значителен печат во аналите на пркосот и искажувањето на слободната и критичка мисла.

Неодамнешните собири и протести за воздухот,  јавниот превоз,  правата на жените, подалечните средношколски и студентски протести во Македонија, Чехословачка, СФР Југославија, Кина, Мексико и низа други во регионот и во светот, се потврда дека младите и граѓаните се тука и будно ги следат општествените процеси, без разлика на својата некогаш ненавремена реакција кон одредени настани и случувања. Во оваа насока, нашите колеги од Србија реагираа симултано, за целосно да го расветлат случајот и причините поради кои беше предизвикан, а ние како нивни колеги во духот на солидарноста искажуваме целосна поддршка кон изразување на бунтовниот студентски порив и револуција. 

Илија Колев, младински активист, дипломиран економист и истражувач